වනජීවි දෙපාර්තමේන්තුවේ සහ පොල්පිතිගම, අඹන්පොල යන පොලිස් ස්ථානවලින් ලබාගත් තොරතුරුවලට අනුව මේ උත්සාහය පිටුපස සිටින්නේ නාගල රජමහා විහාරයේ භික්ෂූන් වහන්සේ නමක් සහ නියෝජ්ය ඇමැතිවරයෙකි. ආණ්ඩුවේ ඉහළ පෙළේ සම්බන්ධකම් ඇති මේ භික්ෂූන් වහන්සේගේ සමීපතමයන් පිරිසක් සහ අදාළ නියෝජ්ය ඇමැතිවරයාගේ රියැදුරකු මේ සිද්ධිය සම්බන්ධයෙන් දැනට අත්අඩංගුවට ගෙන තිබේ.
වනජීවි දෙපාර්තමේන්තුවේ අදාළ කලාපය භාර සහකාර අධ්යක්ෂවරයා සහ පොල්පිතිගම පොලීසියේ ස්ථානාධිපතිවරයා ද මේ උත්සාහය සාර්ථක කර දීමට ඉදිරිපත් වී සිටිති. වනජීවියේ අදාළ සහකාර අධ්යක්ෂවරයා වර්තමාන වන සම්පත් ඇමැති ගාමිණී ජයවික්රම පෙරේරාගේ ඥාතියකු බව සඳහන් කරන විශ්වාස කටයුතු ආරංචි මාර්ග, ඔහු ඒ ඥාතිත්වය භාවිත කරමින් වනජීවී අපරාධ සිදු කරන බවට පරිසර සංවිධාන මගින් ද අවස්ථා කිහිපයකදී චෝදනා කර තිබූ බව ද මතක් කර සිටී.
මීට අදාළ විමර්ශන අපරාධ පරීක්ෂණ දෙපාර්තමේන්තුවට භාර දුන් බව මාධ්ය ඔස්සේ පැවසුණද, මේ වනවිටත් ඊට අදාළ පරීක්ෂණ පවත්වනු ලබන්නේ අඹන්පොල පොලිසිය මගිනි.
පානදුර, වලාන දූෂණ මර්දන ඒකකය මගින් මීට සෘජු සම්බන්ධයක් ඇති බවට සැකපිට ඇත් දළ විකිණීමට උත්සාහ දැරීමේදී සැකකරුවන් දෙදෙනකු අත්අඩංගුවට ගෙන තිබිණි. ඔවුන් පොල්පිතිගම පොලිසියට භාරදීමෙන් පසු විධිමත් ප්රශ්න කිරීමකින් තොරව අධිකරණයට ඉදිරිපත් කළ බව පොල්පිතිගම පොලීසියේ අභ්යන්තර ආරංචි මාර්ග සඳහන් කරයි. ඉන්පසු අඹන්පොල පොලිසිය මගින් මොරගොල්ලාගම ප්රෙද්ශයේ දඩයමේ යන පුද්ගලයන් කිහිප දෙනකු අත්අඩංගුවට ගෙන අදාළ හස්තියා මරාදැමීමේ චෝදනාව යටතේ අධිකරණයට ඉදිරිපත් කර ඇති බවත්, ඔවුන්ගේ නිවෙස් වල තිබූ යකඩ කපන කියතක් ඇතුළු භාණ්ඩ කිහිපයක් අත්අඩංගුවට ගෙන ඇති බවත් සදහන් කරන විශ්වාස කටයුතු ආරංචි මාර්ග, ඔවුන්ගෙන් මීට අදාළව බලහතකාරයෙන් කට උත්තර ලබාගැනීමට පොලිසිය ප්රබල උත්සාහයක් දරා ඇති බව ද අනාවරණය කර සිටී.
මේ අතර අදාළ භික්ෂූන් වහන්සේට සහ නියෝජ්ය ඇමැතිවරයාට සම්බන්ධකම් ඇති සැකකරුවන් පොලිසියට පවසා ඇති ආකාරයට හස්තියා මරා දමා සිටියදී තමන්ට දැකගන්නට ලැබුණු බවත්, මරා දමා තිබූ හස්තියාගේ දළ කැපූ බවත් තහවුරු කිරීමට අදාළ සාක්ෂි නිර්මාණය කිරීමේ උත්සාහයක් ද ක්රියාත්මක වේ.
මේ සදහා වයඹ පළාතේ ඉහළ පොලිස් නිලධාරියකුගේ සහයෝගය ලබාගැනීමට ද මේ වනවිට අදාළ කුමන්ත්රණකාරීන් උත්සාහ දරමින් සිටින බව හෙළි වේ.
ඊයේ (12) මහව මහේස්ත්රාත් අධිකරණයේදී ගල්ගමුවේ දළ පූට්ටුවා මරා දැමීම සහ දළ කපා ජාවාරම් කිරීමට අදාළ නඩුව විභාගයට ගත් අවස්ථාවේ විත්තිය වෙනුවෙන් පෙනී සිටි නීතීඥවරුන් සඳහන් කළේ විත්තිකරුවන්ට එරෙහිව ඇතා ඝාතනය කිරීම සම්බන්ධයෙන් චෝදනා එල්ල වී නොමැති බවයි. ඇත්දළ ජාවාරම සම්බන්ධයෙන් අත්අඩංගුවට පත් සැකකරුවන්ට දළ පූට්ටුවාගේ ඝාතනය සම්බන්ධයෙන් මේ දක්වා කිසිදු චෝදනාවක් එල්ල වී නොමැති බැවින් සැකකරුවන්ට ඇප ලබා දිය හැකි බව ද ඔවුන් පවසා තිබිණි.
නීති තර්ක කෙසේ වෙතත් දළ පූට්ටුවා මරා දැමීමේ සිද්ධියෙන් පසු මෙසේ අදාළ සැකකරුවන් ඇතා නොමැරූ බවත්, ඔවුන් දළ කැපීම පමණක් කළ බවත් තහවුරු කිරීමට අවශ්ය කරුණු ඒකරාශී කරමින් සිටින අතර, සමහර විට ඉදිරියේදී අහිංසකයකු ඇතා මැරූ බවට සැකපිට පොල්පිතිගම පොලීසියෙන් අත්අඩංගුවට ගැනීමට ඉඩ ඇති තිබේ.
මේ අනුව කොටදෙනියාවේ සේයා සිදුවීමේදී මෙන්ම කහවත්තේ මිනීමැරුම්වලට අදාළව පොලිසිය කටයුතු කළාක් මෙන් තවත් කොණ්ඩයන් පිරිසක් අත්අඩංගුවට ගෙන, ඒ හරහා මේ අපරාධය කළ සැබෑ අපරාධකරුවන් නිදහස් කිරීමේ ප්රබල උත්සාහයක් ක්රියාත්මක වන බවට බරපතල සැකයක් මතු වේ.
මේ යන්නේ ඒ පාරේය.
0 comments :
Post a Comment