බ්‍රිතාන්‍ය කිරීටයේ කෙන්සින්ග්ටන් මාලිගය විසින් පසුගියදා මෙම රාජකීය විවාහය පැවැත්වෙන දිනය නිල වශයෙන් දැනුම් දෙනු ලැබීය.
මෙම රාජකීය විවාහය චාල්ස් සහ ඩයනාගේ වැඩිමහලු පුතු වන විලියම් කුමරුගේ සහ කේට් කුමරියගේ විවාහ මංගල උත්සවයෙන් පසුව බ්‍රිතාන්‍ය තුළ සිදුවන ප්‍රමුඛතම රාජකීය විවාහ මංගලෝත්සවය බව නොකිවමනාය.
මෙහිදී, විදෙස් මාධ්‍ය විසින් විලියම් කුමරු මෙම විවාහ මංගල උත්සවයට නොපැමිණෙනු ඇති බව පවසන්නේ, 2018 මැයි 19 වැනිදා බ්‍රිතාන්‍යයේ වාර්ෂික පාපන්දු සැණකෙළිය හෙවත්, FA කුසලාන අවසන් මහා තරගය ලන්ඩනයේ වෙම්බ්ලි ක්‍රීඩාංගණයේදී එදිනම පැවැත්වෙන නිසාය.
මෙම පාපන්දු අවසන් මහා තරගය අත්හැරීම විලියම් කුමරුට අතිශය අපහසු කරුණක් වනු ඇති බව පෙන්වාදෙන මාධ්‍ය වාර්තාවල දැක්වෙන්නේ, හැරී කුමරුට සිය මංගල්‍යයේදී දෙවැනි මනාලයෙකු අහිමි වනු ඇති බවටද සරදම් කරමිනි.
එමෙන්ම, බ්‍රිතාන්‍යයේ බොහෝ රාජකීය විවාහ උත්සව සතියේ දිනවල පවත්වා තිබුණත්, හැරී කුමරුගේ විවාහ මංගල උත්සවය සෙනසුරාදා දිනයක පැවැත්වීමට තීරණය කිරීමද විශේෂත්වයකි.
කෙසේ වෙතත්, මෙම විවාහ මංගල උත්සවය සඳහා ඔහුගේ ආච්චි අම්මා වන දෙවැනි එළිසබෙත් රැජින ඇතුළු අනෙකුත් රාජකීයයන් සහභාගී වීම දැනටමත් තහවුරු කෙරෙමින් ඇති අතර, මාර්කල්ගේ දෙමවුපියන් වන තෝමස් මාර්කල් සහ ඩොරියා මර්කල්ද එම අවස්ථාවට සහභාගි වීමට නියමිතය.
එනමුදු, රාජකීය විවාහ මංගල උත්සවය සමග, සමස්ත බ්‍රිතාන්‍යයක් වැළඳගත් දැවැන්ත ක්‍රීඩා සැණකෙළියක අවසන් මහා තරගයද පැවැත්වීම තුළ විවාහ මංගල උත්සවයට සහභාගී වන්නන් තුළද වික්ෂිප්ත බවක් ඇතිවිය හැකි බව එම මාධ්‍ය වාර්තාවල වැඩිදුරටත් සඳහන් වෙයි.
0 comments :
Post a Comment