උතුරු පළාත තුළ මත්ද්‍රව්‍ය භාවිතය ඉහළ ගොස් ඇති බවට ජනාධිපතිවරයා දෝෂාරෝපණයෙන් යුතුව කතා කළද එය නතර කිරීමට පියවර ගත යුත්තේද ජනාධිපතිවරයාම බව උතුරු පළාත් සෞඛ්‍ය අමාත්‍ය පී. සත්‍යලිංගම් මහතා පවසයි.
අමාත්‍යවරයා මේ බව පැවසුවේ පසුගියදා ජනාධිපති, මෛත්‍රීපාල සිරිසේන මහතා යාපනයේදී කළ ප්‍රකාශයක් සම්බන්ධයෙන් අදහස් දක්වමිනි.
ජනාධිපතිවරයා ප්‍රකාශ කොට තිබුණේ ශ්‍රී ලංකාවේ පරිපාලන දිස්ත්‍රික්ක 25 අතරින් මත්පැන් අලෙවි කොය රජයට විශාලම ආදායම ලබාදෙන්නේ යාපනය දිස්ත්‍රික්කයෙන් බවයි.
යාපනය දිස්ත්‍රික්කයේ පමණක් මත්පැන් අලෙවිසැල් 75ක් පමණ ඇති බවත් යාපනය වැසියන්ට ඇති විශාලම ප්‍රශ්නය මත්පැන් බවත් එහිදී ජනාධිපතිවරයා පැවසීය.
මෙම තත්ත්වය වලක්වා ගන්නා ලෙස ජනාධිපතිවරයා උතුරේ බලධාරීන්ගෙන් ඉල්ලීමක් කළද තමන් පළාතේ සෞඛ්‍ය අමාත්‍යවරයා වශයෙන් පවසන්නේ එය සිදුකිරීමට උතුරු පළාත් සභාවට බලයක් නොමැති බව යැයි සත්‍යලිංගම් මහතා කියාසිටියේය.
මත්පැන් අලෙවි සැල් සඳහා බලපත්‍ර නිකුත් කිරීම හා ඒ සම්බන්ධයෙන් කටයුතු කිරීමේ බලය ඇත්තේ මධ්‍යම රජයට බව පැවසූ ඒ මහතා උතුරු පළාතට ලබාදෙන බලපත්‍ර සංඛ්‍යාව ජනාධිපතිවරයා විසින් සීමා කළයුතුව ඇතැයිද පැවසීය.
උතුරු පළාතේ මත්පැන් අලෙවිසැල් සඳහා නීති රෙගුලාසි උල්ලංඝඛය කරමින් බලපත්‍ර ලබාදීමත් ඒවා සීමා නොකිරීමත් නිසා උතුරේ මත්පැන් අලෙවි සැල් සංඛ්‍යාව ඉහළ ගොස් ඇති බවත් ඒ හේතුවෙන් උතුරේ මත්ද්‍රව්‍ය භාවිතාවේ සීග්‍ර වර්ධනයක් ඇති බවත් සත්‍යලිංගම් මහතා පෙන්වාදුන්නේය.
තවද උතුරු - නැගෙනහිර පළාත්වල වැසියන් වැඩි වශයෙන් මත්පැන් හා මත්ද්‍රව්‍ය භාවිතා කරනු ලබන්නේ වසර 30ක් පැවති යුද්ධය නිසා ඔවුන් මානසික ප්‍රශ්න රැසකට මුහුණ දී සිටීම නිසා බවද ඔහු කියාසිටියේය.
ජනාධිපතිවරයාගේ එම ප්‍රකාශයෙන් පසුව උතුරු පළාත තුළ ඇති සැබෑ තත්ත්වය පිළිබඳව සියලු කරුණු ඇතුලත් ලිපියක් තමන් විසින් මේ වනවිය ජනාධිපති ලේකම් කාර්යාලය වෙත යවා ඇතැයි ද ඒ මහතා වැඩිදුරටත් සඳහන් කර සිටියේය.
දිනසේන රතුගමගේ
0 comments :
Post a Comment