අනුරාධපුර, පොලොන්නරුව, මාතලේ දිස්ති‍්‍රක්කවල ජනතාවගේත් රජරට ගොවි ජනතාවගේත් පානීය ජල ගැටලුව නිමා කෙරෙන මොරගහකන්ද – කළුඟග සංවර්ධන ව්‍යාපෘතිය 2018 වසරේදී ජනතා අයිතියට පවරන බව ජනාධිපති මෛත්‍රීපාල සිරිසේන මහතා පවසයි.
ජනාධිපතිවරයා මේ බව ප්රකාශ කළේ ඊයේ (13) අනුරාධපුර මහජන ක්‍රීඩාංගණයේ පැවති උපාධිධාරීන් 1000ක් ගුරු සේවයට බඳවා ගැනීමේ උත්සවයට සහභාගී වෙමිනි.
'දහසක් මල් – ඉගෙනුමට මුල් තැන' මැයෙන් උතුරු මැද පළාතේ පාසල්වල පවතින ගුරු හිඟයට පිළියමක් ලෙස දැනුම කේන්ද්‍රීය සමාජයක් උදෙසා උපාධිධාරින් 1000ක් ගුරු සේවයට බඳවා ගැනීම හා දිවයිනේ ප‍්‍රථම වරට පෙර පාසල් ගුරුවරියන් 2500 ක් සඳහා රක්ෂණ හිමිකම් සහ සේවක අර්ථසාධක අරමුදලේ දායකත්වය ලබාදීම ද මෙහිදී සිදුවිය.
එමෙන්ම දිවයිනේ ප‍්‍රථම වරට පළාත් පාලන ආයතන සඳහා උසස් ජාතික ගණකාධිකරණ ඩිප්ලෝමාධාරින් 25 ක්, සහකාර ගිණුම් නිළධාරින් ලෙස බඳවා ගැනීම ද සිදු කෙරිණි.
ජනාධිපතිවරයා මෙහිදී අදහස් දක්වමින් කියාසිටියේ එක් දිස්ති‍්‍රක්කයකට එක් ලෙසකටත් තවත් දිස්ති‍්‍රක්කයකට තවත් ලෙසකටත් බෙදන දේශපාලනඥයින්ගේ අවශ්‍යතාවය මත කි‍්‍රයාත්මක කෙරෙන සංවර්ධන න්‍යාය පත‍්‍රය වෙනුවට ජාතික සංවර්ධනයේ ප‍්‍රමුඛතා හදුනාගත් සැමට සාධාරණ සමබර සංවර්ධනයක් වත්මන් රජය විසින් රට තුළ කි‍්‍රයාත්මක කරමින් සිටින බවයි.
ආණ්ඩු හදන අය තමන්ගේ ප‍්‍රදේශ පමණක් සංවර්ධනය කර ගැනිම හේතුවෙන් දශක 03 ක ම්ලේච්ඡ යුද්ධයකට අපට මුහුණදීමට සිදු වූ බවද සිහිපත් කළ ජනාධිපතිවරයා අප දොස් නැගිය යුත්තේ අප විසින් ඉටු කළයුතු වගකීම් ඉටු නොකිරීම පිළබඳව මිස මතුව තිබෙන අසමානතාවය පිළිබදව හඩ නඟන අයට නොවන බව ද ප්රකාශ කළේය.
උත්සව සභාව ඇමතූ ජනාධිපතිතුමා වැඩිදුරටත් ප්රකාශ කළේ රටට ගැළපෙන නව දර්ශනයක් සමඟ අධ්‍යාපන ප‍්‍රතිපත්තින් සකස් කිරීමට නව රජය කටයුතු කරමින් සිටින බවයි.
රුවන්වැලි සෑය විහාරාධිපති පූජ්‍ය පල්ලේගම හේමරතන නායක ස්වාමින් වහන්සේ ප‍්‍රමුඛ මහා සංඝරත්නය ද, අන්‍යාගමික පූජකවරුන් ද, අමාත්‍යවරුන් වන දුමින්ද දිසානායක, පී හැරිසන්, චන්ද්‍රානි බණ්ඩාර, උතුරු මැද පළාත් ආණ්ඩුකාර පී.බී. දිසානායක, ප‍්‍රධාන අමාත්‍ය පේෂල ජයරත්න යන මහත්ම මහත්මීන් ඇතුළු දේශපාලන නියෝජිතයින් රැසක් ද මෙම අවස්ථාවට එක්ව සිටියහ.
0 comments :
Post a Comment