මියන්මාර් රජය විසින් 2007 වසරේ දී ශ්‍රී දළදා මාලිගාවට පරිත්‍යාග කළ ඇතුන් දෙදෙනා වෙනුවෙන් රුපියල් මිලියන 262 කට ආසන්න ව්‍යාජ ඉන්වොයිස් වටිනාකමක් ශ්‍රී ලංකා රේගුවට පෙන්වා එම මුදල මෙරටින් මියන්මාර් දේශයට යවා ඇති බවට තිරසාර සංවර්ධන හා බෞද්ධ කටයුතු ඇමැතිවරයා පත්කළ කමිටුවක් මගින් කළ පරීක්ෂණයකින් තහවුරුවීම මුදල් විසුද්ධිකරණයට සම්බන්ධ බැවින් දියවඩන නිළමේවරයාට එරෙහිව නඩු පවරා ඔහුගේ නිලය තහනම් කරන ලෙස 'සුරකිමු සිරි දළදා' ජාතික ව්‍යාපාරයේ සභාපති ආර්.එස්.පී.බී සේනානායක මහතා බෞද්ධ කටයුතු කොමසාරිස් ජනරාල් වෙත පෙරේදා (24)ලිඛිත පැමිණිල්ලක් කර තිබේ.
එහි පිටපත් ජනාධිපති, අගමැති, තිරසාර සංවර්ධන, වනජීවි හා බෞද්ධ කටයුතු ඇමැතිවරයා, අධිකරණ හා විදේශ කටයුතු ඇමැතිනිය හා නීතීපති වෙතද යොමුකර ඇත.
මහනුවර යටිනුවර වීදියේ ඩෙවෝන් රෙස්ට් හිදී ඊයේ (25) පැවැති මාධ්‍යය හමුවක දී සේනානායක මහතා මෙම තොරතුරු අනාවරණය කළේය. ඉහත සඳහන් ඉන්වොයිස් වටිනාකම පියවා ගැනීමට ශ්‍රී දළදා මාලිගාවේ හෝ රජයේ මුදල් භාවිත කර ඇද්ද යන්න තහවුරු කර ගැනීම සඳහා පියවර ගන්නා ලෙසද ඒ මහතා ලිපියෙන් ඉල්ලීමක් කර තිබේ.
ශ්‍රී දළදා මාලිගාවේ පැවිදි භාරකාරත්වය හොබවන මල්වතු අස්ගිරි මහනායක ස්වාමින්ද්‍රයන් වහන්සේ දෙනම ප්‍රමුඛ විංසත් වර්ගික කාරක සංඝ සභික හිමිවරුන්ට මෙම චෝදනා සම්බන්ධ සොයා බැලීමේ වගකීමක් තිබෙන බවත් මෙම මුදල් දළදා මාලිගාවේ මුදල් නොවන්නේ නම් ඒ කාගේ මුදල් ද යන්න රටට හෙළි කිරීම දියවඩන නිලමේවරයාගේ වගකීම බවත් හෙතෙම කීය. මේ සම්බන්ධව කළ විමසීමක දී දියවඩන නිළමේ ප්‍රදීප් නිලංග දෑල මහතා පැවසුවේ මියන්මාරයෙන් පරිත්‍යාගයක් ලෙස දළදා මාලිගාවට ලැබුණ ඇතුන් දෙදෙනා වෙනුවෙන් ශ්‍රී දළදා මාලිගාවේ අරමුදල්වලින් සතයක් හෝ භාවිත කර නොමැති බවයි.
මෙවැනි පරිත්‍යාගයක් කරන විට එම ත්‍යාගයට වටිනාකමක් මියන්මාරයෙන් ලබාදී තිබෙන බවත් එම ලියකියවිලිවල සඳහන් වටිනාකම ගැන සඳහන් කර මුදල් හුවමාරුවක්වූ බවට සඳහන් කිරීම සම්පූර්ණයෙන්ම සත්‍යය විකෘති කීරීමක් බවත් ඒ මහතා කීය. ලෝකයේ පවතින සයිටීස් නීතියට අනුව රටකින් රටකට සතෙක් විකිණිය නොහැකි බවත් සිදුකළ හැක්කේ පරිත්‍යාගයන් හෝ හුවමාරුවක් පමණක් බවත් කී ඒ මහතා එම නීතිය මගින් සතෙකු මුදලට විකිණිය නොහැකි බව තහවුරු වන බවද අවධාරණය කළේය.
0 comments :
Post a Comment