දෙපාර්ශ්වය අතර වූ අදාළ එකඟතාවට අනුව නියෝජ්‍ය කථානායක ධුරයට පත්වූ තිලංග සුමතිපාල මහතා එම ධුරයෙන් ඉල්ලා අස්වීමෙන් පසු ඒ සඳහා තවත් අයකු නම් කිරීමේ අයිතිය සන්ධාන පාර්ශ්වය වෙත හිමි විය යුතු වුවත්, එජාපය විසින් එයට තමන්ගේ නියෝජිතයකු ඉදිරිපත් කිරීම තවදුරටත් ජාතික ආණ්ඩුවක් නොපවතින බවට පැහැදිලි සාක්ෂියක් යැයි එම විචාරකයෝ පෙන්වා දෙති.
ජාතික ආණ්ඩුවේ එජාප පාර්ශ්වයේ අත්තනෝමතික ක්‍රියා කලාපය හේතුකොටගෙන ශ්‍රී ලනිපය එයින් ඉවත් විය යුතු බවට මතවාදී සටනක් මීට වසරකට පමණ පෙර සිට ශ්‍රී ලනිපය තුළ ඇතිව තිබූ බවද ඔවුහු කියති.
අගමැති රනිල් වික්‍රමසිංහ මහතාට එරෙහිව ඒකාබද්ධ විපක්ෂය ගෙනා විශ්වාසභංගයට ශ්‍රී ලනිප ජේ‍යෂ්ඨයන් කිහිපදෙනකුද ඇතුළත්ව මැති ඇමැතිවරුන් 16 දෙනකු ඊට පක්ෂව ඡන්දය භාවිත කර විපක්ෂයට එක් වූයේ ආණ්ඩුවේ අභ්‍යන්තර අරගලය උණුසුම් තත්ත්වයකට පත්වීම නිසා බවද පෙන්වා දෙන ඔවුහු නියෝජ්‍ය කථානායකවරයා තෝරා ගැනීමේදී ජාතික ආණ්ඩු එකඟතාවන්ට පිටුපෑම හරහා වෙන්වීමේ උච්චස්ථානය කරා එළැඹ ඇති බවද වැඩිදුරටත් පවසති.
එජාපයෙන් ආනන්ද කුමාරසිරි මහතාගේ නම නියෝජ්‍ය කථානායක ධුරයට යෝජනා වූ අතර සුදර්ශනී ප්‍රනාන්දුපුල්ලේ මහත්මිය ජයග්‍රහණය කරවීම ජනපති මෛත්‍රිපාල සිරිසේන මහතාගේ අවශ්‍යතාවක් වූ බැවින් ඇයගේ නම යෝජනා කරන ලෙස ඇමැති මහින්ද අමරවීර මහතාට ජනාධිපතිවරයා විසින් දැනුම්දී තිබූ බවත්, එහෙත් අමරවීර මහතා විසින් ඇයගේ නම යෝජනා කිරීම මඟහැරි බවත් කියති.
මෙම ඡන්ද විමසීමෙන් ජාතික ආණ්ඩු ගිවිසුම අවසන් වූ බවත් දැනට ආණ්ඩුවේ සිටින ශ්‍රී ලනිපයේ 23 දෙනාට ආණ්ඩුවෙන් ඉවත් වීම සඳහා අගමැති රනිල් වික්‍රමසිංහ මහතා ෙදාර විවෘත කර තිබෙන බවත් මේ ගැන කළ විමසීමකදී ශ්‍රී ලනිපයෙන් ඉවත් වී මේ වන විට විපක්ෂය නියෝජනය කරන පාර්ලිමේන්තු මන්ත්‍රි චන්දිම වීරක්කොඩි මහතා සඳහන් කළේය.
මේ අතර ආණ්ඩුව නියෝජනය කරන ශ්‍රී ලනිප 23ගෙන් අතළොස්සක් ඡන්දය නොදී මඟ හැරීමට උත්සාහයක් ගත් අවස්ථාවේ ඡන්දය දෙන ලෙසට ජනාධිපතිවරයා සිය පාර්ලිමේන්තු කටයුතු ලේකම්වරයා හරහා කෙටි පණිවුඩ මඟින් දැනුම් දුන් බවද දැනගන්නට ඇත.
ආණ්ඩුවෙන් ඉවත් වූ ශ්‍රී ලනිප 16 දෙනා මහින්ද රාජපක්ෂ මහතා හමුවූ අවස්ථාවේ සුදර්ශනී ප්‍රනාන්දුපුල්ලේ මහත්මිය නියෝජ්‍ය කථානායක ධුරයට යෝජනා කරන බව දැනුම් දී තිබූ අතර ඒකාබද්ධ විපක්ෂය ඇයට සහාය දෙන බවටද ප්‍රකාශ කෙරිණි.
ඒ අනුව පසුගියදා පැවැති ඒකාබද්ධ විපක්ෂයේ පක්ෂ නායක රැස්වීමට පසුව, ඊයේ පෙරවරුවේ පැවැති පක්ෂ නායක රැස්වීමේදීද මහින්ද රාජපක්ෂ මහතා ප්‍රනාන්දුපුල්ලේ මහත්මියට සහාය පළ කරන ලෙස දැනුම් දී ඇත.
ඒ අවස්ථාවේ ගම්පහ දිස්ත්‍රික් මන්ත්‍රි ප්‍රසන්න රණතුංග මහතා එයට විරෝධය ප්‍රකාශ කර ඇත. මහින්ද රාජපක්ෂ මහතා එයට ප්‍රතිචාර දක්වමින් ප්‍රකාශ කර තිබෙන්නේ ප්‍රසන්නත්, ගම්පහ දිස්ත්‍රික්කයේ අනෙක් දෙදෙනාත් විරුද්ධ නම් ඡන්ද නොදී ඉන්න. අනෙක් අය සුදර්ශනීට ඡන්දය දෙන්න යනුවෙනි.
මේ අතර නියෝජ්‍ය කථානායක තෝරා ගැනීම සඳහා පැවැති රහස් ඡන්දයේ අවසාන මොහොතේ බාහිර බලපෑමක් මත ඡන්ද දීමෙන් වැළකී සිටි ඒකාබද්ධයේ කීප දෙනකු ඡන්දය දීමට පැමිණ සිටි ඒකාබද්ධයේ මන්ත්‍රිවරුන් දුරකථනය ඔස්සේ පාර්ලිමේන්තු කැන්ටිමට කැඳවා ගෙන ගොස් කැන්ටිමේ වාඩි කරවා ගෙන ඡන්දය දීමෙන් වළක්වා ගෙන ඇති බවද වාර්තා වේ.
එක්සත් ජාතික පක්ෂයෙන් නියෝජ්‍ය කථානායක ධුරයට ඉදිරිපත් කළ මන්ත්‍රිවරයා ජයග්‍රහණය කරවීමේ අරමුණින් ඒකාබද්ධ විපක්ෂයේ මන්ත්‍රිවරුන් 18 දෙනකු ඡන්දය දෙන අවස්ථාව මඟ හැර ඇත.
0 comments :
Post a Comment