යහපාලනය, නොම පාලනයක් නොකොට පාලනයක් සහිත, විනයක් සහිත රටක් ගොඩනැගීමට ජනතාව දුන් ජනවරම ඉදිරියට ගෙන යෑමට කටයුතු කළයුතු බවත් විශේෂයෙන්ම නීතිය හා සාමය ආරක්ෂා කරන පොලීසිය ඇතුළු බලවේග ඒ සඳහා ප‍්‍රමුඛව කටයුතු කළ යුතු බව මහා නගර හා බස්නාහිර සංවර්ධන අමාත්‍ය පාඨලී චම්පික රණවක මහතා අවධාරණය කරයි.
අමාත්‍යවරයා මේ බව පවසා සිටියේ අද (06) බත්තරමුල්ල වෝටර්ස් ඒජ් ආයතනයේ පැවති, නාගරික සංවර්ධන අධිකාරිය, වෝටර්ස් ඒජ් ආයතනය සහ ක‍්‍රීඩා අමාත්‍යාංශය එක්ව ආරම්භ කිරීමට යෝජිත ක‍්‍රීඩා සංකීර්ණයක් ඉදිකිරීම සඳහා ත්‍රෛයි පාර්ශ්වික අවබෝධතා ගිවිසුම් අත්සන් කිරීමේ අවස්ථාවට එක්වෙමිනි.
වර්තමානයේ මහජන උද්ඝෝෂණවල ප‍්‍රධාන ස්ථානයක් බවට බත්තරමුල්ල නගරය යොදා ගැනීමට ඇතැම් පිරිස් උත්සාහ කරමින් සිටින බවත්, එය බත්තරමුල්ල ප‍්‍රදේශයේ පරිපාලන කටයුතු සඳහා ප‍්‍රබල ප‍්‍රශ්නයක් ඇති කිරීමට හේතු වී තිබෙන බවද අමාත්‍යවරයා පෙන්වා දෙයි.
ප‍්‍රජාතන්ත‍්‍රවාදී රටක හිංසාවාදී නොවන ආකාරයට මහජන උද්ඝෝෂණ සිදුකිරීම පිළිබඳව කිසිවෙකුටත් විරුද්ධ විය නොහැකි වගේම උද්ඝෝෂකයන්ද තමන්ගේ කාර්යය අන් අයට හිරිහැරයක් මෙන්ම රාජකාරී කටයුතු සඳහා හිරිහැරයක් නොවන ලෙස කිරීමට වගබලා ගත යුතු බවද හෙතෙම සඳහන් කළේය.
යහපාලනය යන ක‍්‍රියාවලියෙන් නොම පාලනයක් අදහස් නොවන අතර පාලනයක් නැති අරාජික තත්ත්වයක් යහපාලනයෙන් ජනතාව බලාපොරොත්තු නොවන බවද අවධාරණය කරන අමාත්‍යවරයා, සියළු උද්ඝෝෂණ සහ අනෙකුත් සියළුම ප‍්‍රජාත‍්‍රාන්ත‍්‍රික විරෝධතාවලට සීමාවක් තිබෙන බව සියළුදෙනාම මතක තබාගත යුතු බවද පෙන්වා දෙයි.
සාමකාමීව ජනතාවට කලබලයකින් තොරව තමන්ගේ රාජකාරී කටයුතු කරගැනීමට තිබෙන අයිතිය උල්ලංඝනය කිරීමට කිසි කෙනෙකුට ඉඩදීමට හැකියාවක් නොමැති බවත්, ප‍්‍රජාතන්ත‍්‍රවාදයේ නාමයෙන් අනෙකුත් ජනතාවගේ අයිතීන් උල්ලංඝනය කිරීමට ඉඩකඩ නොතබන ලෙස බලධාරීන්ගෙන් ඉල්ලා සිටින බවද අමාත්‍යවරයා සඳහන් කර සිටී.
0 comments :
Post a Comment