තමන්ට සයිටම් ආයතනය ස්ථාපිත කිරීම සඳහා වැයවූ ණය මෙන්ම ආයතනයේ ආචාර්ය,මහාචාර්යවරුන්ට, වෛද්‍යවරුන් ඇතුළු සියලුමදෙනාට වැටුප් ගෙවීමට යන මුදල් ගෙවීමට හැකිනම් ආයතනයේ අයිතිය සම්පූර්ණයෙන්ම පවරා ගන්නා ලෙස තමන් රජයෙන් ඉල්ලා සිටින බව සයිටම් ආයතනයේ නිර්මාතෘ වෛද්‍ය නෙවිල් ප්‍රනාන්දු මහතා පවසයි.
ඊයේ (14) දිනයේ විශ්වවිද්‍යාල ප්‍රතිපාදන කොමිෂන් සභාවේ සභාපතිතුමන් ඇතුළු බලධාරීන් හමුවූ අවස්ථාවේදී තමන් ඒ ආකාරයෙන් ඉල්ලා සිටි බව නෙවිල් ප්‍රනාන්දු මහතා පැවසීය.
ආයතනය පිහිටුවීම සඳහා ලබාගත් ණය බිලියන 2ක් පවත්නා බවත්, සේවය කරන උදවියට වැටුප් ගෙවීම සඳහා මසකට මිලියන 50 ක් වැයවන බවත්, එම විදයම් දරාගැනීමට හැකිනම් මෙම ආයතනය පවරාදීමට හැකි බව තමන් පැවසූ අවස්ථාවේදී විශ්වවිද්‍යාල ප්‍රතිපාදන කොමිෂන් සභාව එය ප්‍රතික්ෂේප කළ බවත්, අඛණ්ඩව සිසුන් බඳවා ගන්නා ලෙස දැනුම්දුන් බවත් ප්‍රනාන්දු මහතා අවධාරණය කළේය.
හිටපු ජනාධිපතිවරයා සයිටම් ආයතනය පවත්වාගෙනයාම සම්බන්ධයෙන් විරුද්ධත්වයක් නොමැති බවත්, එය වසාදැමීමේ අවශ්‍යතාව ඇත්තේ එතුමා අසළ සිටින ගොඩ පෙරකදෝරුවාටයි, ත්‍රී වීල් පක්ෂයක් වන මහජන එක්සත් පෙරමුණේ මනුස්සයටයි බවත් ඔහු මෙහිදී කියා සිටියේය.
හිටපු ජනාධිපතිවරයා විසින් සයිටම් ආයතනයේ කිහිපදෙනෙකුට ශිෂ්‍යත්ව දුන්නු බවට මාධ්‍ය මගින් ප්‍රචාරයක් ගෙන ගිය නමුත්, එම ශිෂ්‍යත්ව ලබාදුන්නේ තමන් විනා හිටපු ජනාධිපතිවරයා නොවන බවද නෙවිල් ප්‍රනාන්දු මහතා අවධාරණය කළේය.
ඒ සාමාර්ථ හා බී සාමාර්ථ ලබා ගත් නමුත් විශ්වවිද්‍යාලය අධ්‍යාපනයට අවස්ථාව නොලැබුණු කිහිපදෙනෙකුට අවස්ථාවක් දෙන ලෙස කරනු ලැබූ ඉල්ලීමක් අනුව උපකුලපති මල්කාන්ති චන්ද්‍රරත්න මිය සමග කතා බහ කොට තමන් විසින් එම කිහිපදෙනාට ශිෂ්‍යත්ව දුන් බවත්, ඒවා ප්‍රදානය කිරීම පමණක් හිටපු ජනාධිපතිවරයාගේ අතින් සිදුකෙරුණු බවත් හෙතෙම පෙන්වා දුන්නේය.
කෙසේ වෙතත් තමන් මේ අවස්ථාවේදී හිටපු ජනාධිපතිවරයාගෙන්ද ඉල්ලා සිටින්නේ යළි ශ්‍රීලනිපයට එක්වී වත්මන් ජනාධිපතිවරයා හා අග්‍රාමාත්‍යවරයා සමග සහයෝගයෙන් කටයුතු කරන ලෙස බවත්, එසේ නොමැතිව හිටපු ජනාධිපතිවරයාට දේශපාලන අනාගතයක් නොමැති බවත් වෛද්‍ය නෙවිල් ප්‍රනාන්දු මහතා වැඩිදුරටත් සඳහන් කළේය.
0 comments :
Post a Comment