ශ්‍රී ලංකා නැව් සංස්ථාවට අයත් දෙවැනි නෞකාව වන සිලෝන් ප්‍රින්සස් (Ceylon Princess) නෞකාව ඊයේ (05) මව්රටට සේන්දු විය.
ඊයේ උදෑසන මංගල ගමනින් කොළඹ වරායේ නැගෙනහිර පර්යන්තයට සේන්දු වූ එම නෞකාව පිළිගනු ලැබුවේ වරාය සහ නාවික අමාත්‍ය අර්ජුන රණතුංග මහතාය.
චීනයේ AVIC International සමාගමේ නිර්මාණයක් වන මෙම නෞකාව 2016 වසරේ ජූනි මස 15වැනිදා සාදා නිම කරනු ලැබීය.
එහි සහෝදර නෞකාව වූ සිලෝන් බ්‍රීස් නෞකාව මීට ප්‍රථමයෙන් ස්වකීය මෙහෙයුම් ආරම්භ කළේ 2016 මාර්තු මස 15 වැනිදායි.
පසුගිය රජය සමයේදී මිලදී ගත් මෙම නෞකා දෙක සඳහා වැය කර තිබූ සම්පූර්ණ මුදල අමෙරිකානු ඩොලර් මිලියන 70කි.
ඊයේ පැවැති පිළිගැනීමේ උත්සවයේදී වරාය සහ නාවික අමාත්‍ය අර්ජුන රණතුංග මහතා ප්‍රකාශ කළේ මෙම නෞකා දෙකට වැයවූ මුදලින් නෞකා 04ක් මිලදී ගැනීමට තිබුණු බවයි.
ඒ අනුව මෙම නෞකාවලින් ශ්‍රී ලංකා නැව් සංස්ථාවට පැටවුණු ණය බර ප්‍රමාණය අති විශාල බවද අර්ජුන රණතුංග අමාත්‍යවරයා පැවසීය.
කෙසේනමුත් එතුමා අවධාරණය කළේ ණය ප්‍රමාණය කළමනාකරණය කරගනිමින් නෞකා ආරක්ෂා කර ගැනීමට හැකි සෑම පියවරක්ම ගන්නා බවයි.
වැඩිදුරටත් අදහස් දැක්වූ ඒ මහතා කියාසිටියේ,"වරාය අමාත්‍යාංශය මම භාරගන්නකොට අපිට තිබුණ ලොකුම අභියෝගයක් වුණේ මේ නෞකා දෙක භාර ගැනීම. නමුත් මේ නෞකාවලින් රටට ආලෝකය සපයන ගල් අඟුරු ප්‍රවාහනය කරමින් පසුගිය වසරේදී අපි සැලකිය යුතු මට්ටමේ ලාභයක් ලබා ගත්තා. ප්‍රමාදවීම් සඳහා ගෙවීම් කිරීම් අඩුවුණා. ඒ නිසා මේ නෞකාවලින් නැව් සංස්ථාවට විය හැකි පාඩුව අවම කර ගත හැකි යැයි මම අපේක්ෂා කරනවා. ඉදිරියටත් නැව් සංස්ථාවට අලාභයක් නොවන විදියට මේ නෞකා හැසිරවීමට උපාය මාර්ග පිළිබඳවද අවධානය යොමු කරමින් සිටිනවා. සමහර වෙලාවට අපිට හිතට එකඟ නැති තීරණ වුණත් ගන්න සිද්ධ වේවි. මම වඩාත්ම කැමතියි මේ නැව් සංස්ථාව දියුණු වෙලා ගමේ ඉන්න දරුවන්ට නැවකට නගින අවස්ථාවක් ලබාදෙන්න" ලෙසයි.
ඡායාරූප පහතින්.
0 comments :
Post a Comment