විනය විරෝධී ක්‍රියා මත භික්ෂුවක මහා විහාරීය පාර්ශ්වයෙන් ඉවත් කිරීමට තීරණය කළ පසු තවදුරටත් භික්ෂුවක ලෙස නොපිළිගැනෙන අතර, එවන් පිරිස් භික්ෂු වේශයෙන් චීවරධාරිව සමාජය ඉදිරියේ පෙනී සිටීම වැළැක්වීම පිණිස අවධානය යොමු කර ඇති බව මල්වතු පාර්ශ්වයේ නියෝජ්‍ය ලේඛකාධිකාරි, සෝමාවති විහාරාධිපති පූජ්‍ය පහමුණේ සුමංගල නාහිමියෝ පවසති.
මෙවැනි චීවරධාරීන්ගේ ක්‍රියාකලාපය බලවත් ගැටලුවක් බව පැවසූ නාහිමියෝ ඔවුන් දිවයිනේ විවිධ ප්‍රදේශවල සිදු කරන නොයෙකුත් ධර්ම විරෝධි ක්‍රියා සම්බන්ධව ජනතාව තමන් වහන්සේ සහ ලේඛකාධිකාරි හිමිවරුන් වෙත සාක්ෂි සහිතව ලිඛිත දැනුම් දීම් සිදු කරන බව බවසමින්, මේ සම්බන්ධයෙන් ගත යුතුව තිබෙන ක්‍රියාමාර්ග පිළිබඳ අවධානය යොමු කරමින් පසුගියදා මල්වතු අස්ගිරි මහනාහිමිවරුන් ජනාධිපතිවරයා වෙත ලිපියක්ද යොමු කර ඇත.
භික්ෂුවක සිදු කළ යම් වරදක් සම්බන්ධයෙන් පරීක්ෂණ පැවැත්වීමෙන් පසු මහනාහිමි ප්‍රමුඛ කාරක සංඝ සභාව මඟින් ඊට ලබා දෙන දණ්ඩනය තීරණය කරන බවත්, අනතුරුව අදාළ පාර්ශ්වයේ මහනාහිමියන් විසින් එම තීන්දුව ක්‍රියාත්මක කරනු ලබන බවත් උන් වහන්සේ ප්‍රකාශ කරති.
මේ අතර, කිසියම් පාර්ශ්වයක් මඟින් යම් භික්ෂුවක එම පාර්ශ්වයෙන් නෙරපා හැරිය හොත් ඒ භික්ෂුවට ශාසනික වරප්‍රසාද ලැබීමට හෝ ගෝළයන් ශාසනයට ඇතුළත් කිරීමට හෝ විහාරාධිපති ධුර දැරීමට හෝ නොහැකි බවත්, මෙය සිවුරු ඇරවීමක් ලෙස පිළිගැනෙන මුත් ඔවුන් දිගටම සිවුරු දරා සිටීම ප්‍රශ්නයක් බවත් අස්ගිරි පාර්ශ්වයේ නියෝජ්‍ය ලේඛකාධිකාරි පූජ්‍ය නාරංපනාවේ ආනන්ද හිමියෝ පවසති.
ධර්ම-විනයට පටහැණිව ක්‍රියා කළ භික්ෂූන් වහන්සේ අදාළ පාර්ශ්වයෙන් ඉවත් කිරීමෙන් පසු ඔවුන්ගේ භික්ෂු ලියාපදිංචිය අහෝසි කිරීම විහාර දේවාලගම් ආඥා පනතට අනුව බෞද්ධ කටයුතු කොමසාරිස් විසින් කළ යුතු වුවද එම නීතිය මෙතෙක් ක්‍රියාත්මක නොවීම බරපතළ ගැටලුවක් බවද මල්වතු අස්ගිරි උභය මහා විහාරීය භික්ෂූන් වහන්සේ පෙන්වා දෙති.
0 comments :
Post a Comment