එක්සත් ජාතික පක්ෂයේ සහ ජනතා විමුක්ති පෙරමුණේ සහයෝගය ඇතිව එළඹෙන වසරේදී පෙබරවාරි 4 වැනිදාට පෙර නව ආණ්ඩුක්‍රම ව්‍යවස්ථාවේ කෙටුම්පතක් ඉදිරිපත් කිරීමට හැකිවනු ඇති බව දෙමළ සන්ධානයේ පාර්ලිමේන්තු මන්ත්‍රී එම්.ඒ. සුමන්තිරන් මහතා පැවසීය.
යාපනයේ පිහිටි සුමන්තිරන් මන්ත්‍රීවරයාගේ නිල නිවසේදී ඊයේ (29දා) පැවති මාධ්‍ය සාකච්ඡාවකදී අදහස් දක්වමින් හෙතෙම මේ බව පවසා සිටියේය.
එහිදී වැඩිදුරටත් අදහස් දැක්වූ මන්ත්‍රීවරයා,
“අපිත් ජනතා විමුක්ති පෙරමුණත් එකතුවෙලා තමයි නව ව්‍යවස්ථාවට අදාළ අතුරු කමිටු වාර්තාව ගෙනා වේ. එහි උතුරු නැගෙනහිර පළාත් එකතු වෙන්න ඕන කියලා අපි සටහන් කරලා තියෙනවා. මහජන එක්සත් පෙරමුණ විතරයි ඒකට අකමැති වුණේ. නමුත් ජනතා විමුක්ති පෙරමුණ එයට අදහසක් දැක්වූයේ නැහැ ඔවුන් කිව්වේ දැනට එය නොවිය යුතු දෙයක් කියලා පළාත් ඒකාබද්ධ වෙනව නම් එහෙම එකතු වෙන්න පුළුවන් නමුත් එහෙම එකතු වෙන්න ජනමත විචාරණයකට යා යුතුයි කියලා එම වාර්තාවේ සටහන් කරලා තියෙනවා එම කරුණට ජනතා විමුක්ති පෙරමුණ එකඟයි.
අගමැතිවරයා මහනායක හිමිවරුන් හමු වුණා. එහිදී බුද්ධාගමටත් ප්‍රමුඛස්ථානයක් දෙනවා කියන ප්‍රවෘත්තිය පළ වෙලා තියෙනවා. ඒ බව අතුරු කමිටු වාර්තාවෙත් තියෙනවා. බුද්ධාගමට ප්‍රමුඛස්ථානයක් දී ගැන අපිට ප්‍රශ්නයක් නැහැ. නමුත් ඒ වගේම අනිත් ආගම්වලටත් සමානව සලකන්න ඕනේ.
මහින්දගේ පාර්ශ්වය කියන දෙයක් තමයි නොවැම්බර් 07 වැනිදා ගේන්න තිබුණ ව්‍යවස්ථා කෙටුම්පතට බාධා කරන්න තමයි අපි වෙනසක් කළේ කියලා. හැබැයි අපි ජාතික ආණ්ඩුවක් හදාගන්න අපේ සහාය පළ කළේ අපිට අරමුණක් තිබුණු හින්දා.
දැන් ඉක්මනින් නව ව්‍යවස්ථාවේ වැඩ කටයුතු කරගෙන යනවා. එළඹෙන පෙබරවාරි 04 වැනිදාට කලින් එ.ජා.ප., ජ.වි.පෙ. සහ අපිත් එකතු වෙලා හදපු කෙටුම්පතක් ඉදිරිපත් වෙයි කියලා අපි බලාපොරොත්තු වෙනවා. දැනටමත් විශේෂඥ කමිටුව දීපු වාර්තාවේ තිබෙන කරුණු ගැන අපේ පාර්ශ්ව 03 සලකා බලනවා.
ශ්‍රී ලංකා නිදහස් පක්ෂය ආණ්ඩුවෙන් ඉවත්වුණු නිසා පාර්ලිමේන්තු බහුතරය නැහැ කියලා කියනවා. හැබැයි ශ්‍රී ලංකා නිදහස් පක්ෂයෙන් 20ක් 21 දෙනෙක් විතර ආණ්ඩුවට එක්වෙන්න යනවා කියලා කියනවා. ඒ හින්දා අද ඒ අය අතරෙම අර්බුදයක් ඇති වෙලා. ඒ නිසාම එයාලට පක්ෂ කාර්යාලය වහන්නත් සිදු වෙලා. එයාලගෙන් එහෙම පිරිසක් ආවොත් අපේ අනිත් පාර්ශ්වයත් එක්ක 150කට වැඩි ප්‍රමාණයක් ඉක්මවා යනවා."
0 comments :
Post a Comment