බස්රථවල ආසන වෙන් කරන අලුත් ක්‍රමයක්!

පෞද්ගලික බස්රථ යොදා ගනිමින් කොළඹ සිට දුර ගමන් සේවා වල යන මගීන්ගේ පහසුව සඳහා ජාතික ගමනාගමන කොමිසම විසින් නව වෙබ් අඩවියක් හඳුන්වා දී තිබේ.

ඒ අනුව www.ntcbooking.lk වෙබ් අඩවිය අන්තර්ජාල පහසුකම් ඇති ඕනෑම පරිගණකයකින් හෝ ජංගම දුරකථනයකින් තමන්ට අවශ්‍ය ආසන වෙන් කරවා ගැනීමට ඊයේ(26) දින සිට හැකි බව ප්‍රවාහන හා සිවිල් ගුවන් සේවා අමාත්‍යාංශය අවධාරණය කරයි.

මෙම online වෙබ් අඩවිය ආරම්භ කිරීම ඊයේ දින සවස ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා මහතා විසින් බත්තරමුල්ලේ පිහිටි ප්‍රවාහන හා සිවිල් ගුවන් සේවා අමාත්‍යාංශ ශ්‍රවණාගාරයේදී සිදුකෙරිණ.

මෙම ආසන වෙන්කිරීමේ වැඩපිළිවෙල යටතේ පෞද්ගලික බස් රථයකින් ගමන් ගන්නා සෑම මගියෙකුටම අවම පිරිවැයකින් හා විශ්වාසනීයත්වයෙන් යුතුව එම ගමන සැළසුම් කරගැනීමට හැකියාව ලැබෙනු ඇත.

මේ සඳහා මගියෙකුට තමන්ගේ ටිකට් පතේ ගාස්තුවට අමතරව රුපියල් 30ක් වැනි අමතර මුදලක් ගෙවීමට සිදුවනු ඇත.

දැනට මාර්ග ගත ආසන වෙන්කර ගැනීම වෙනුවෙන් මගීන් විවිධ පෞද්ගලික ආයතනවලට හා පුද්ගලයින්ට අධික මුදල් ප්‍රමාණයක් ගෙවීමට හා තැරැව්කරුවන්ගේ බලපෑම්වලට මගීන්ට මුහුණ දීමට සිදුවී ඇත.

මෙම නව වැඩපිළිවෙල ආරම්භ වීමත් සමඟම බාධාවකින් තොරව පහසුවෙන් තම ආසනය මගියාට වෙන්කරවා ගැනීමට හැකියාව ලැබෙන බව අමාත්‍යාංශය තවදුරටත් අවධාරණය කරයි.

මෙහි මුල් අදියර යටතේ කොළඹ සිට කතරගම - යාපනය - බදුල්ල - අම්පාර - දෙණියාය- පස්සර - ලුණුගල - අකුරැස්ස - තිරුකෝවිල් - මඩකලපුව - පේදුරුතුඩුව - මඩොල්සිම - අනුරාධපුර - ඩයගම- ත්‍රිකුණාමලය වැනි දුරස්ථ සේවා ඇතුලු සේවා 35 ක මාර්ග ගත ආසන වෙන්කිරීමේ පහසුකම් ලබාදීමට ජාතික ගමනාගමන කොමිසම කටයුතු කර ඇත.

පොදු ප්‍රවාහන සේවාවේ ගුණාත්මකභාවය වැඩිදියුණු කරමින් රාජ්‍ය අංශය විසින් දියත් කරන සුරක්ෂිතභාවය සමඟ පොදු මහජනතාවට ලබාදෙන මෙම පහසුකම තුළින් තව තවත් මගී ජනතාව පොදු ප්‍රවාහන සේවාවට ආකර්ශණය කරගැනීම මෙම වැඩපිළිවෙලෙහි අරමුණ වී ඇත.

මෙම වැඩපිළිවෙලේ 2 වන අදියර යටතේ ඩිජිටල් කාඩ් පතක් මඟින් වෙන් කරන ලද ආසන සඳහා මුදල් ගෙවීමේ පහසුකම් ලබාදීමටද කටයුතු කරන බව ජාතික ගමනාගමන කොමිසම අවධාරණය කරයි.

මෙම online ව්‍යාපෘතිය ආරම්භ කිරීමේ අවස්ථාවට ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා මහතා, අමාත්‍යාංශ ලේකම් ජී.එස්.විතානගේ, ජාතික ගමනාගමන කොමිසමේ සභාපති එම්.ඒ.පී.හේමචන්ද්‍ර යන මහත්වරුන් ඇතුලු අමාත්‍යාංශයේ නිලධාරීන්ද, මෙම ව්‍යාපෘතිය ක්‍රියාත්මක කරනු ලබන ශ්‍රී ලංකා ටෙලිකොම් ආයතනයේ සභාපති, මහජන බැංකුවේ නිලධාරීන් පිරිසක්ද සහභාගී විය.