හිටපු සන්ඩේලීඩර් කර්තෘ සහ මාධ්‍යවේදී ලසන්ත වික්‍රමතුංග මහතාගේ ඝාතනයට අදාළ එවකට පරීක්ෂණ පැවැත්වූ දැනට රහස් පොලිසිය මඟින් අත්අඩංගුවට ගෙන බන්ධනාගාර ගතකර සිටින එම පොලිස් නිලධාරීන්ගේ ආරක්ෂාව සම්න්ධව බරපතළ ගැටලුවක් ඇති වී ඇති බව පවසන රහස් පොලිසිය ඔවුන්ගේ ආරක්ෂාව වැඩි කිරීමට පියවර ගන්නා ලෙස බන්ධනාගාර දෙපාර්තමේන්තුවෙන් ඉල්ලීමක්ද කර තිබේ.
ගල්කිස්ස පොලිසියේ හිටපු අපරාධ අංශයේ ස්ථානාධිපති උප පොලිස් පරීක්ෂක සුගතපාල, එවකට එම ප්‍රදේශය භාරව සිටි නියෝජ්‍ය පොලිස්පති ප්‍රසන්න නානායක්කාර යන මහත්වරුන්ගේ ආරක්ෂාව සම්බන්ධයෙන් ගැටලු සහගත තත්ත්වය පැන නැගී ඇති බව රහස් පොලිසිය පවසයි.
එනම් මීට වසර කීපයකට ඉහතදී මෙම ඝාතනය සම්බන්ධයෙන් අත්අඩංගුවට ගෙන බන්ධනාගාර ගතව සිටි නුවරඑළියේ ජේසුදාසන් සහ ලසන්ත ඝාතනයට යතුරුපැදියේ පැමිණි අනුරාධපුරයේ තරුණයෙකු එම කාලය තුළ අභිරහස් ලෙසමිය ගොස් තිබීම අවධානයට ගනිමිනි. ජේසුදාසන් යන අය බන්ධනාගාරය තුළදීම මිය ගොස් සිටි අතර යතුරු පැදි සැකකරු ඇප ලබා සිටියදී හදිසි අනතුරකින් අභිරහස් ලෙස මිය ගොස් තිබිණි.
ලසන්ත ඝාතනය සම්බන්ධයෙන් වැදගත් තොරතුරු රැසක් සමඟ එම ඝාතනයට ආදළ සැකකරුවන් සම්බන්ධ වැදගත් සාක්ෂියක් ඔවුන්ගේ මරණයත් සමඟ අහිමි විය. දැනට බන්ධනාගාරගතව සිටින උප පොලිස් පරීක්ෂක සුගතපාල මහතාත් හිටපු නියෝජ්‍ය පොලිස්පති ප්‍රසන්න නානායක්කාර මහතාත් බැලීමට බන්ධනාගාරයෙන් අවසර නොලබා වෙනත් රැඳවියෙකු බැලීමට අවසර ගත් පුද්ගලයෙක් පසුගිය දිනෙක ප්‍රසන්න නානායක්කාර මහතාත් සුගතපාල මහතාත් හමුවීමට ගොස් ඇති බව රහස් පොලිසිය අනාවරණය කර ගෙන තිබුණි.
ඔහු පසුගිය රජය සමයේ ජනාධිපති කාර්යාලයේ පාර්ලිමේන්තු කටයුතු වලට සම්බන්ධව සිටි ජ්‍යෙෂ්ඨ නිලධාරියෙකු බවද හෙළිකර ගෙන තිබේ.
ඔහු දුමින්ද සිල්වා මහතා බැලීමට යැයි අවසර ලබා ගෙන ඒ මහතා බැලීමට නොගොස් ඉහත සඳහන් පොලිස් නිලධාරීන් බැලීමට ගොස් ඇති බවද රහස් පොලිසිය පවසයි.
රහස් පොලිසිය මෙම සිද්ධිය සහ ලසන්ත වික්‍රමතුංග ඝාතන සිද්ධියේ ප්‍රධාන පරීක්ෂක නිලධාරීන් මෙන්ම ඉදිරියේදී එම නඩුවේ ප්‍රධාන ශාක්ෂිකරුවන් බවටද පත් වීමට ඉඩ ඇති මෙම නිලධාරීන් හොර රහසේ බැලීමට ගොස් ඇත්තේ එම සාක්ෂිකරුවන්ට යම් බලපෑමක් එල්ල කිරීමට ද එසේත් නැතහොත් යම් කිසි තර්ජනයක් එල්ල කිරීමටද යන්න සැක සහිත තත්ත්වයක් ඇතිවී තිබෙන බව පසුගිය සතියේ රහස් පොලිස් නිලධාරීන් ගල්කිස්ස මහේස්ත්‍රාත්වරයා වෙතද වාර්තා කර තිබුණි.
ලසන්ත වික්‍රමතුංග මහතාගේ දින පොත සහ ගල්කිස්ස පොලීසිය පැවැත්වූ පරීක්ෂණ වල අස්ථාන ගත කර සහ වෙනස් කර තිබූ කූට ලේඛන සියල්ලක්ම සොයා ගනු ලැබුවේ උපපොලිස් පරීක්ෂක සුගතපාල මහතාගේ නිවසේ සඟවා තිබියදීය. ඒවා මෙම ඝාතනය ඔප්පු කිරීමට ඇති වැදගත් සාක්ෂි වන අතර ලසන්ත ඝාතනයට සහ එම පරීක්ෂණ ඒ ආකාරයෙන් වෙනස් කිරීමට උපදෙස් හෝ නියෝග මෙම නිලධාරීන්ට ලැබුණේ කොහෙන්ද කාගෙන්ද යන්න සම්බන්ධයෙන් කරුණු හෙළිදරව් කිරීමට මෙම පොලිස් නිලධාරීන් ඉදිරියේදී සූදානම්ව සිටින බැවින් ඒ අනුව ඔවුන්ට යම් බලපෑමක් එල්ල වුවහොත් ජේසුදාසන් සහ අනෙක් සැකකරුගේ සාක්ෂි අහිමි වී ගියා. සේ මෙම නිලධාරීන්ගේ සාක්ෂිද යටපත් වීමට ඉඩ තිබිය හැකි බව රහස් පොලීසිය සැක කරයි. එසේ වුවහොත් ලසන්ත ඝාතනය යළිත් ඔප්පු කර ගැනීමට නොහැකි වන බව ඔවුන්ගේ විශ්වාසය වෙයි.
එම නිසා මෙම පොලිස් නිලධාරීන්ගේ ආරක්ෂාව සම්බන්ධයෙන් විශේෂ අවධානයක් යොමු කළ යුතු බැවින් රහස් පොලිසිය අධිකරණයට සහ බන්ධනාගාර දෙපාර්තමේන්තුවට මෙසේ දැන්වීම සිදු කර තිබේ.
0 comments :
Post a Comment