ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් ඊයේ (15 දා) ජනාධිපති ලේකම් කාර්යාලයේ පැවැති කැබිනට්‌ රැස්‌වීමේදී දූෂණ චෝදනා එල්ල වී ඇති රාජපක්‍ෂ පවුලේ සාමාජිකයන්ට සහ පසුගිය ආණ්‌ඩුවේ මැති ඇමැතිවරුන්ට මෙතෙක්‌ නීතිය ක්‍රියාත්මක නොවීම සම්බන්ධයෙන් ඇමැතිවරුන් ප්‍රශ්න කිරීම නිසා එම රැස්‌වීම දැඩි උණුසුම්කාරී තත්ත්වයක්‌ ගෙන ඇත.
මෙහිදී කැබිනට්‌ ඇමැතිවරුන් විශාල පිරිසක්‌ දැඩි ආවේගයෙන් අදහස්‌ දැක්‌වූ බව සඳහන් වේ.
මෙම කටයුතු විශේෂ අධිකරණයක්‌ මගින් නීත්‍යනුකූලව කිරීමට ව්‍යවස්‌ථාවෙන් අවස්‌ථාවක්‌ නොමැති නම් දැනට පවතින අධිකරණයක කටයුතු කැප කර එය මහාධිකරණයක්‌ බවට පත් කිරීමෙන් පසු දූෂිත වංචා නඩු විභාග කිරීමට කටයුතු කරන මෙන් තිරසර සංවර්ධන හා වනජීවී ඇමැති ගාමිණී ජයවික්‍රම මහතා දැඩිව සඳහන් කර ඇත.
මෙම යෝජනාවට පක්‍ෂව බහුතරයක්‌ ඇමැතිවරුන් අදහස්‌ දැක්‌වූ බව සඳහන් වන අතර සාගල රත්නායක, තිලක්‌ මාරපන, පාඨලි චම්පික රණවක ඇමැතිවරුන් එහි පෙරමුණ ගෙන කටයුතු කර තිබේ.
එසේම අධිකරණ ඇමැති විජයදාස රාජපක්‍ෂ මහතාගේ ක්‍රියා කලාපය පිළිබඳවද ඇමැතිවරුන් මෙහිදී අදහස්‌ දක්‌වා ඇති අතර ඔහුගේ පිළිතුර වී ඇත්තේ තමන්ට අධිකරණයට බලපෑම් කළ නොහැකි බවයි. එසේම ඒ. එච්. එම්. ෆවුසි මහතාට සහ පියංකර ජයරත්න මහතාට විරුද්ධව පවරා ඇති නඩු, මහා පරිමාණ දූෂණ වංචා ලෙස සැලකිය නොහැකි බවට මෙහිදී අදහස්‌ පළවී තිබේ.
රජය තවදුරටත් මෙලෙස කටයුතු කළහොත් හොරු අල්ලන්නේ කෙසේදැයි ඇමැතිවරුන් විමසා ඇති අතර එය ආණ්‌ඩුවේ පැවැත්මට කිසිසේත්ම හිතකර නොවන බවද පවසා ඇත.
About Ceylon News 24x7
Srilanka 24 Hours Online Breaking News Web Portal...
0 comments :
Post a Comment