වෙලාවට ගමන් යන්න රේල් බස් සේවාව ව්‍යාප්ත කරයි

මගී තදබදය අවම කිරීමේ අරමුණින් පේරාදෙණිය සිට ගම්පොළ දුම්රිය ස්ථාන අතර රේල් බස් සේවාවක් අද (14) සිට ආරම්භ කර තිබේ.

ඒ අනුව පෙරවරු 9.23ට පේරාදෙණිය දුම්රිය ස්ථානයෙන් පිටත්වන රේල් බස් රථ පෙරවරු 9.51ට ගම්පොළ දුම්රිය ස්ථානයට ළඟාවීමට නියමිත අතර පස්වරු 1.20ට පේරාදෙණියෙන් පිටත්වන රේල් බස් රථය පස්වරු 1.48ට ගම්පොළ දුම්රිය ස්ථානය වෙත ළඟාවීමට නියමිතයි.

එමෙන්ම පෙරවරු 10.00ට ගම්පොළ දුම්රිය ස්ථානයෙන් පිටත්වන රේල් බස් රථය පෙරවරු 10.55ට පේරාදෙණිය දුම්රිය ස්ථානය වෙත ළඟාවීමට නියමිත අතර පස්වරු 2.10ට ගම්පොළ දුම්රිය ස්ථානයෙන් පිටත්වන රේල් බස් රථය පස්වරු 2.44ට පේරාදෙණිය දුම්රිය ස්ථානයට ළඟා වීමට නියමිත බවත් වාර්තා වෙයි.

තදාසන්න නගර අතර පවතින මගී තදබදය අවම කිරීමේ අරමුණින් එම රේල් බස් රථ සේවාව දිවයිනේ විවිධ නගර අතර ක්‍රියාත්මක කිරීමට සැලසුම් කර ඇති බව දුම්රිය දෙපාර්තමේන්තුව සඳහන් කළේය.

ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා මහතාගේ උපදෙස් මත මෙම රේල් බස් සේවාව ව්‍යාප්ත කිරීමට සැලසුම් කර ඇති අතර දැනටමත් දිවයිනේ විවිධ නගර අතර රේල් බස් සේවාව ක්‍රියාත්මකව පවතී.

ත්‍රිකුණාමලය - ගල්ඔය, මඩකලපුව - ගල්ඔය, හලාවත - පුත්තලම, අනුරාධපුර - මැදවච්චිය, කුරුණෑගල - මහව -පේරාදෙණිය - මහනුවර, මහරගම - කොස්ගම යන නගර අතර මෙම රේල් බස් සේවා ක්‍රියාත්මක වේ.

මහනුවර සිට මාතලේ දක්වාද රේල් බස් සේවයක් මීට සමගාමීව ආරම්භ වෙනු ඇත.

මේ නිසාම ඉදිරියේදී මගී තදබදය තියෙන තදාසන්න නගර අතර රේල් බස් සේවය ව්‍යාප්ත කිරීමට අදාළ සැලසුම් සකස් කර ඇති බව දුම්රිය දෙපාර්තමේන්තුව පවසයි.

බොහෝ දුරට කාර්යාල සේවකයන්ට නියමිත වෙලාවට කාර්යාල වෙත ගමන් කිරීමටත්, ආපසු නිවෙස් වලට යාමත් රේල් බස් සේවාව විශාල පිටිවහලක් වී ඇති බවද දුම්රිය දෙපාර්තමේන්තුව වැඩිදුරටත් පවසයි.