තමා ආණ්ඩුවේ සිටියද රටටම බලපාන ප්‍රශ්නවලදී ශ්‍රී ලංකා ලංකා නිදහස් පාක්ෂිකයෙකු ලෙස ස්වාධීනව තීන්දු ගන්නා බව ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති, අමාත්‍ය නිමල් සිරිපාල ද සිල්වා මහතා පවසයි.
අමාත්‍යවරයා මේ බව ප්‍රකාශ කළේ පසුගියදා බදුල්ල පුස්තකාල ශ්‍රවණාගාරයේ පැවති බදුල්ල ශ්‍රී ලංකා නිදහස් පක්ෂ බල මණ්ඩල රැස්වීම අමතමිනි.
එහිදී අමාත්‍යවරයා කියාසිටියේ තමන් රජයට එක්වීමට ගත් තීරණය දේශපාලනමය වශයෙන් නිවැරදි බව තමන් සිතන බවත් එයට ජනතාවගේ ප්‍රශංසාව නොලැබීමට ද හැකි නමුත් එම තීරණය ගනු ලැබුවේ ජනතාවට සේවය කිරීමට මිස තමන්ට සේවයක් කරගැනීමට නොවන බවත්ය.
ඒ සම්බන්ධයෙන් වැඩිදුරටත් අදහස් දැක්වූ අමාත්‍යවරයා මෙසේද පැවසීය.
" අද මෙතනට රැස් වූ ජනතාවගේ ප්‍රතිචාරයෙන් මට දැනුණේ මම ජාතික රජයට එක්වෙලා ඇමතිකමක් ගැනීම අනුමත කරන බවයි. අද මම මේ රජයට එකතු වුණු නිසයි බදුල්ල ජනතාවට යම් සංවර්ධනයක්, රැකියාවක් ලබාදීමට පුළුවන්කම ලැබුණේ. එහෙම නැතුව ඒකාබද්ධ විපක්ෂයට ගොස් ලිප්ටන් වටරවුමේ පිකටිං කරා නම් ජනතාව වෙනුවෙන් කරන්න දෙයක් මට නැති වෙනවා. මේ නිසා මම ගත්තු තීරණය අනුමත කරන්න කොටසකුත් ඉන්නවා. නොකරන කොටසකුත් ඉන්නවා. එය ජනතාවගේ ප්‍රජාතන්ත්‍රවාදී නිදහසයි.
හැබැයි මම ජාතික රජයට එක්වෙලා හිටියත් රටට බලපාන ජාතික ප්‍රශ්නයකදී ශ්‍රී ලංකා නිදහස් පක්ෂිකයෙකු ලෙස ස්වාධීන තීන්දුවක් ගැනීමට කටයුතු කරනවා."
මෙම පක්ෂ බල මණ්ඩල රැස්වීමට නිදහස් පක්ෂයේ ප්‍රාදේශීය දේශපාලනඥයින් ඇතුළු විශාල පිරිසක් සහභාගී වී සිටියහ.
About විගස පුවත් I Vigasapuwath
0 comments :
Post a Comment